Aftaná eina væleydnaðan Havnatúr, har eg fekk væl av skafti, fór eg mær ein seinasta túr áðrenn leiðin gongur til Danmarkar í morgin. Veðrið var av tí besta, og tað føldist sera lætt at renna í kvøld. Møtti Ernst og Malan, sum fóru sær ein gongu túr heima á sandin. Teirri seinasti km var runnin. Ja nú má røkka ella støkka í Stockholm. Eg fari so at gera mítt allarbesta, og vóni vit øll fáa eina super túr. So vítt eg veit so vera vit 18 í ferðalagnum. Tað fer at verða stuttligt.

Nú eg fari av landinum, so verður tað ikki gerandiskostur at eg hvønn morgun stígi á vektina. Men í morgun segði hon so 73 kg, píl niður 😉 Eg ætlaði so heilt vist at koma niður í móti 71 kg. Men eg skal ikki klaga, eg havi so nøkurlunda fingið skila á matarlystinum, eg eri heldur minni grammur nú. So um eg haldi á fram við nýggja stiílinum, hóast tað til tíðir er sera freistandi at leggja hann á hillina, so vænti eg at tað gongur ikki long tíð til 71 verður at síggja á vektini. Nú fáa vit at síggja.

Góða nátt.

Hendan vikan royndist avbera væl, eg fekk runnið 50 km, og er tað langt síðani síðst at so var. Hóast eitt sindur óskikkiligur á fóðurfrontinum, so er vektin enn niðan fyri 73 kg. Hon segði í morgin 72,8. Nú og fram til Stockholm er ikki annað at gera enn at halda formin viðlíka, og eta skilagott, ikki koyra for nógv ókrút í munnin.

Seinnapartin var eg saman við Treysti á Viðareiði og skipaði fyri árligu Viðareiðisrenningini. Í ár er 10. árið upp í slag at vit hava skipa fyri rennikapping. Gutti vildi gera eitt sindur meira burtur úr í samband við at 10 ára eru liðin síðan fyrstu ferð, so hann hevði tikið málportalin við norður, og hann tók seg bara heilt væl út á Nýggjavegi. Vildi tó ynskt at uppmøting var betur. Veðrið í dag var super.

Nú er kl. bert 23, og útlitini fyri einum góðum náttarsvøvi eru bara heilt góð.

Góða nátt.

Aftur í morgun kundi eg staðfesta at góða gongdin við vektini heldur fram. Í morgun segði vektin 72,5 kg.

Í dag hevur eingin renning verið á skránni.Eg havi verið í Havn, og aftur í dag hava vit vitja góðu matstovuna hjá FK, har eg ikki kundi standa móti freistingini tá ið Maud spurdi um vit skuldi hava “hele svineriet” sum hon plagar at taka til. Tá meinar hon, døgurða, dessert og kaffi. Rullusteik, rís a la mande og kaffi, tað verður ikki betur. Spennandi verður í morgin at stíga á vektina. Ongar søtar sakir ídag.

Eg havi nú í eina tíð roynt hvønn morgun, meðan havragreyturin kølnar. at gera nakrar einfaldar styrkivenjingar. Búk, rygg og bryst. Tað er kanska ikki so avancera, men um tú gjørt tað regluliga, ja so sæst munur tá ein tíð er fráliðin. Eg kann longu merkja mun.

Í morgin er tað Renn fyri heilsuna, næst seinastu ferð, vit enda Hjá Skós, tá verður tað vatn, frukt, vaflir og kaffe/te.

Góða nátt tit – klokkan er 23:11.

Nú bert 9 dagar eru eftir til start í Stockholm segði vektin í morgin 72,6 kg, so góða gongdin heldur fram. Spurningurin um eg sleppi aftur í morgin at taka soleiðis til. Hóast ein sera góðan rennitúr, so havi eg eti eina góða máltíð saman við familjuni, og kanska eg var nakað grammur. Heimagjørdar krebinettir við vælsmakkandi fløta sós. Annars havi eg á fóðurfrontinum  skikka mær heilt væl, ongar søtar sakir í dag.

Ja í dag bleiv tað til ein sera hugaligan jogging túr út í Oyrar. Vera hevði ongan bil so eg valdi at seta bilin við salongina, og byrjaði venjingina har. Ikki meira enn komin niðan til Hans Jacob hjá Dáva hoyri eg onkran koma tivandi aftanfyri meg, og mín sann um ikki eg hoyri Veru gera eitt gallróp, hon biður meg seta ferðina upp annars verið eg yvirhálaður av Jan Petersen, so flennur on so hjartaliga. Jan var eins og eg farin ein túr áðrenn døgurðan, og hevði hann 10 km í tonkuni. Eg avgjørdi so bara at fylgja honum. Hann hugsaði tempo 4:45 ella kanska eitt sindur skjótari, tað passaði mær fínt. Tá ið avtornaði var miðalferðin, tá ið vit skiltust á Bumshamri har Jan býr, 4:35. Túrurin var sera hugaligur og práti okkara millum gekk lystiliga, og sjálvandi fekk okkara felags komandi avbjóðing í Stockholm nógv pláss. Áðrenn vit vistu av høvdu vit lagt teir ætlaðu 10 km afturum.

Jú tað er hugaligar í allar mátar at renna saman við onkrum.

Í morgin er Havna túrur á skránni, so eingin renning. Næsta renning verður Renn fyri heilsuna leygardagin, tá standa eg og Vera sum fyriskiparar. Vit enda hjá Skós. Eg ætli mær at baka vaflir, so tað er bara um at møta upp.

Góða nátt tit – klokkan er nú 23:12. so tað sær út til at eg sleppi í song áðrenn midnátt.

Hvat í vektini viðvíkur so gongur rætta vegin, í morgun segði vektin 72,9 kg, og tá ið tað kemur til fóður, so hevur tað bara verið heilt ok. Tíverri so komi eg neyvan í song áðrenn midnátt, sum eg so avgjørt ætlaði mær. Tað var hatta við hvíldini eg tosaði um í gjár.

Nå, heldur enn at renna intervallir so valdi eg at fara út á Svangaskarði í dag saman við fleiri øðrum treystum íðkarum til eina 5000m test á breyt. Tá ið runnið verður á breyt eitur tað net 5000m, á vegi, harafturímóti, eitur tað skilligt nokk 5 km.

Tað var Gutti, sum vildi fáa eina góðkenda tíð til Mariu Biskopstø, tí hevði hann sett eina 5000m kapping á skrá.

Kvinnur/gentir kl. 18 og menn/dreingir kl. 18:30.

Líkindini vóru ikki av teimum allarsbestu, fitt av vindi og regn. Men onkurvegna so rakti vindurin ikki so meint vøllin, so líkindini at renna, tá ið avtornaði, vóru bara heilt ok. Og tað skuldi eisini vísa seg at blíva ein super dagur fyri Rebekku, Mariu og Einar. Tey settu øll personlig met, so dyggiliga eisini. Maria sum bara er 12 ára gomul rann teir 12,5 umgangirnar uppá 19:10. Heilt fantastiskt. Rebekka minnist meg rætt 19:02 og Einar 17:05. Flott tit trý, hjartaliga tillukku. Hesin 48 ára gamli tjúkkibollin kom dallandi um málstrikuna í tíðini 19:28, ikki so galið, væl hjálptur av Gunnar Simonsen, junior. Einar fekk góða hjálp frá Marnar Djurhuus teir fyrstu 3000 metrarnir.

Við einari tíð uppá 19:28 uppá eina fimmari, gevur mær vónir í hvørtfall at fáa eina tíð í Stockholm sum er undir hálvan annan tíma. So er tað sagt 🙂

Tað verður super tá ið vit einaferð um ikki so langa tíð fáa eina rennibreyt her í Klaksvík.

Góða nátt – ímorgin verður tað ein róligur jogging túrur her í býnum.

Nú bert 11 dagar eru eftir til start í Stockholm segði vektin í morgin 73,5 kg, og eingin renning er á skránni í dag. Eg havi verið til arbeiðis í Havn og tá liggur ofta illa fyri at renna.

Eg byrjaði í morgun við at kóka mær havragreyt við rosinum, og kanelsukur omaná, eitt sindur søtur má eg vera 🙂 Meðan greyturin kølnaði, gjørdi eg nøkur búkøvilsir. Ætli mær at gera tað til eina vana at gera eitt sindur av styrkivenjingum hvønn morgun.

Tá ið klokkan var 12 var eg saman við starvsfeløgum í FK og fekk mær vælsmakkandi Gullash frá Maud Matras. Tíverri seinnapartin lat eg meg freista til okkurt søtt aftur við kaffi. Men eg haldi tó eg havi rætta uppá tað við ikki at fáa mær tann altið obligatoriska drekkamunnin saman við Veru.

Í morgin stendur valgi ímillum at renna intervallir í Ánunum ella 5000 m á Svangaskarði sum Treysti skipar fyri. Gutti helt tað var skilagott at fáa eina góða test í t.d. marathon tempo. So hvør veit kanska eg endi á Svangaskarði í morgin.

Annars kallaði eg hetta innleggi “Umráðandi við hvíld”, her hugsi eg um hvussu umráðandi tað er at fáa nokk av svøvni, og tað er júst tað eg tíverri alt og sjálvdan fái. Eg havi til vana at sita framman fyri telduna til klokkan fer av midnátt. Onkur hevur sagt mær at besti svøvnurin tú fær er tímarnir áðrenn midnátt. Klokkan er nú 23:55, so eg má í song nú, og í døgunum sum kom skal klokkan ikki fáa loyvi at blíva so nógv.

Góða nátt

Hvønn morgun, aftaná eg havi vitja WC, stígi eg á vektina, og í morgun vísti hon 74,3.  Eg vigi alt ov nógv, mín kappingarvekt eigur at liggja beint undir 70 kg, so tit kunnu ætla tað er langur vegur til mína idealvekt. Tað vísur seg eisini, sum flest øll nøkk kenna til, eldri tú blívur, gerst tað altsamt truplari at fáa bilbugt við hesi kilo, sum ikki eiga at vera har.

Tað er ikki gott nokk bara at renna og íðka, eg má eisini broyta uppá mínar matvanar um eg skal koma niður á mína kappingarvekt. Tað er ikki lætt tá ið gleðin, at inntaka góðan mat er so stór. Hvør kennir ikki til tað. Eg royni tó nú fram til Stockholm ½ marathon at fáa meira skil á kostin, soleiðis at eg hugsi meira um hvat eg koyri í munnin.

Annars so bleiv tað til góðar 13 km í dag við 4:52 í snit pr. km. Nokkso troyttir eftir tempo túrin á bandinum ígjár.

Vit hoyrast í morgin. Góða nátt.