Smáttan hjá Archibald

Smáttan hjá Archibald

Smáttan hjá Archibald

Á Hvítubrúgv beint við gomlu bygdagøtuna til Árnafjarðar liggur hugnaliga smáttan hjá Archibald Black. Nátturan har um leiður er stórbar, og staðsetingin av smáttuni er væl gjøgnumhugsa. Smáttan liggur í haganum hjá Archibald.

Saman við øðrum góðum kreftum, var eg við til at fáa fyrsta tilfari niðan á Hvítubrúgv. Archibald hevði gjørt veggir og sperrir í einum goymsluhøli í Klaksvík, so ein góðveðursdag, fleyg tyrlan alt tilfari norður, og tað sum ikki bleiv flogi var borið niðan á Hvítubrúgv. Archibald og vinar eiga síðani uttan iva óteljandi túrar niðan á Hvítubrúgv, meðan smáttan stóð í ger. Eg haldi eg var við 2 ferðir, men hava noti blíðskapin í smáttuni nakrar ferðir, tá ið fólk hevur verið har, tá eg eri komin framvið.

Í dag valdi eg so at gera mær ein túr niðan Gravardal norður eftir Kjølinum til Hvítubrúgv. Ein fínur túrur. At ganga og renna í haganum er bara so doyligt, tað er heilt nakað annað enn at renna á harða asfaltinum. Einki er sum at ferðast í nátturuni, burtur frá øllum býarmeldrinum.

Nú 18 dagar áðrenn langa túrin til Havnar, gongur bar væl, men eg skal tó viðganga at eg kann gott merkja at eg øki venjingina kanska í so skjótt. Høgra skinnabein hevur hug at drilla eitt sindur, men eg uggi meg við at eg skal bara renna hægst 10 km/t. tá eg skal renna til Havnar.

Um tú vil stuðla Alzheimerfelagnum, so kanst tú stuðla mínari renning, allur peningurin fer til Alzheimerfelagið.  Trýst á knøttin her undir, so verður tú beind/ur til stuðulssíðuna.

Stuðulsrenning:
Klaksvík – Tórshavn – 77 km

This slideshow requires JavaScript.

Kunoyarnes 5. juni 2007

Seinastu 2-3 árini er tað vorðið altsamt meira vanligt at fólk eru farin at ganga í fjøllunum, tað er vorðið ein sonn dilla, og tað er sjálvandi sera stuttligt. Serliga í summar, sum higartil hevur verið framúr gott. hevur ligið sera væl fyri at vitja hæddirnar. Í millum fjallatuskarnir verður tosa um Top 10, her er talan um 10 tey hægstu fjøllini í Føroyum. Vit eiga 10 fjøll sum eru omanfyri 800m, harav tey 7 eru í Norðoyggjum. Klárar tú at leggja hesi undir tínar føtur, ja so er tú við í Top 10 bólkinum. Hevur tú verðuliga fingið góða smakkin av at ganga í fjøllunum, so er næsta stigi Top 50, harnæst Top 100 og so til tey heilt garvaðu, sum enn ikki eru so nógv í tali, øll fjøll í Føroyum. Sambært matrikulstovuni eru tað 340 fjøll í Føroyum.

Líka síðani eg var smádrongur hevur mær dámt sera væl at gingið í nátturuni, og havi eg eisini gingið á flestu fjøllum runt um Klaksvíkina. So tá ið eg hoyrdi um gongutúrarnar hjá Djóna og Rana, bleiv eg eitt sindur spentur at sleppa at ganga saman við teimum, og havi eg eisini verið onkran túrin sama við teimum. Á einum túri vit gjørdi í Kallsoynna, tann sokallaða “Tjóðskapargongan” segði ein garva fjallatussa við meg at hon hevði lisið eina grein eg fyri nøkrum árum síðani hevði skrivað á heimasíðuni hjá Treysti. Hetta var ein túrur eg hevði gjørt uppá Kunoyarnes, satt at siga hevði eg gloymt alt um hesa grein. Um henda greinini hevur givið henni hug til hæddirnar, skal eg lata vera ósagt, men nógv fjøll hevur hon gingið, og tað er langt síðani komin í eksklusiva Top 10 klubban.

Eg fari hervið at loyva mær at endurgeva greinina her á síðuni.

Í góðveðrinum grundlógardagin gekk eg mær ein túr uppá Kunoynna, og sá har Klaksvíkina liggja víðopna fyri mínar føtur.

klaksvik

Tað er grundlógardagur 5. juni og veðrið er av tí allar fagrasta. Eg byrji dagin sum so ofta við at seta meg við telduna. Men sum morgunin líður, og veðrið bara gerst betur og betur kemur ein slíkur ófriður á meg, eg leingist eftir at sleppa ein túr í hagan. Um 2 tíðina fái eg ikki bíða longur, eg lati meg í renniklæðir fylli mær eina fløsku við vatni so ryggsekkin á baki og so gongur leiðin norður í Haraldssund við bili. Bilin seti eg beint norðan fyri byrgingina. Máli í dag er at ganga uppá Kunoyarnes. Havi leingi ætla mær hendan túrin, so í dag skuldi tað verða.

Eg leggi leiðina beint niðan frá tunnilsmunnanum, fylgi hegninum til eg komi til bygdaportri, so eri eg í haganum. Gangi niðan í ein dal nakað ovarlaga, finnið so eg eina leið, sum skuldi vísa seg at vera sera hóglig at ganga, men tað var hart allíkavæl. Tað merkist væl í tjúkkunum tá ið man gongur í fjøllunum. Noyðist at klintra eitt sindur fyri at koma longur niðan, hógligast vísur tað seg vera at taka seg upp á sjálvt Kunoyarnes við at ganga suðuryvir. Longur suður eg gangi síggi eg Klaksvíkina spakuliga koma undan, á tann vakra sjón. Havi altíð ynskt við egnum eygum at síggja Klaksvík frá hesum sjónarhorni.

Nú er ikki langt eftir á mál, eri komin gott og væl 600 metur upp, hetta fortelur GPS urið mær, sum hevur innbygdan hæddarmálara. Eg gangi eitt sindur longur suður og so vestur eftir, komi so fram á endan á Kunoyarnesi, og Klaksvíkin liggur fyri mínar føtur. Myndirnar tala fyri seg. Hetta er ikki hægsta punkt á Kunoyarnesi, men herfra sæst Klaksvíkin best. Undarligt at síggja mjørkan liggja sum eina tjúkka dýna allan vegin suðureftir, Nólsoyggin er heilt tildekka av mjørkanum, meðan Klaksvíkin gongur púra frí, og sum Bernhard Brim yrkir, “ei skýkloddi hómast á himli” .

toka

toka2

Eftir at hava noti vakra útsýni eina løtu taki eg meg longur niðan, og mín sann um ikki onnur hava rykt seg úr gerandismeldrinum, og funnið sær veg niðan á Kunoynna. Tá eg komi á hægsta punkt har eisini ein varði er lagaður, møti eg Kristian Olsen okkara fræga svimjara saman við vinfólkum. Vit nýta høvi til at taka myndir av hvørjum øðrum, sum kann verða prógv fyri okkara vitjan á Kunoyarnesi.

kristian_og_co

Sambært hæddarmálaranum so er Kunoyarnes 711 m til hæddar. Kunoyggin er í meðal hægsta oyggj í Føroyum, og hægsta fjalli er Kúvingafjall við sínum 830 m. Tey høgu fjøllini eru norðalaga á Kunoynni. Eg haldi har eg havi verið verður nokk rópt fyri Suður á Nakki, og sambært bókunum 703 m til hæddar.

Nú var so tíðin komin til at ragga sær omanaftur, eg brúkti einans 50 min. at koma niðan á, men tað skuldi vísa seg at vera nógv drúgvari at koma omanaftur. Eg hugsaði við mær sjálvum at stuttligari var ikki at fara sama veg omanaftur, so eg valdi at fara vesturum, og so ganga mær eftir bakkanum norður til Haraldssund. Rættuliga bratt var at ganga, so illa bar til at renna, men fram kemur hann í hóvliga fer, so eftir ein góðan tíma var eg aftur í Haraldssundi hjá bilinum, og ein frálíkur hagatúr var at enda komin.

Eitt, sum eg tó var eitt sindur harmur um var at eg kom til at órógva eina æðu, sum lá á eggum. Eg komi rennandi, og varnist ikki æðuna, hon flýgur av reiðrinum, oman á sjógv. Um eg minnist rætt frá mínari skúlatíð so leggur æðan seg ikki aftur á reiðri.

Jonhard

Tíðin rennur sum streymur í á

Tað er nú næstan ein mánaði síðan eg skrivaði nakað her á síðuni, tá skrivaði eg um hvussu umráðandi tað er at brúka tíð saman við børnunum, tí áðrenn tú veitst av er tað ov seint. Jú, tíðin gongur skjótt, og er tað nokk okkurt í tí, at jú eldri tú verður sýnist tíðin at ganga enn skjótari.

Nå, men tað gongur einki serligt við renningini hjá mær, eg havi ikki rættuliga fingið gongd aftur á renningina. Í dag vitjaði eg Klæmint á Havnar Fyrioterapi fyri 5. ferð. Eg vil siga at tað gongur framá, um enn seint, lyskutrupuleikar kunnu taka langa tíð. Klæmint hevur givið mær nakra venjingar eg skal gera dagliga, og so royni eg at renna 3 ferðir um vikuna. Pínan er at kalla burtur, men á morguntúrinum (til gongu) niðan á Háls í gjár billaði eg mær inn at eg merkti okkurt. Vónandi bert innbildningar.

Nú ætli eg mær at venja miðvíst, men varliga, máli er at kunna luttaka á Ólavsøku, við einari tíð undir 20 min. Ólavsøkurenningin er 5 km.

Niðanfyri nakrar myndir frá morguntúrinum niðan á Háls

IMG_4279

Rinda møðina við góðum útsýni

IMG_4277

Útsýni av Hálsi

IMG_4287

Veðrið var grátt hendan dagin

IMG_4295

Hugnaligi frístaðurin hjá Heina Ósá

 

Við Tórfríð uppi á Kjøli

IMG_4014

Tórfríð við portri niðan í vakra Gravardal

Tíðin saman við børnunum er gull verd. Fyri okkum sum foreldur, og so sanniliga eisini fyri børnini. Men áðrenn vit vita av so eru børnini vaksin. So er spurningurin um vit brúkti nóg nógva tíð saman við børnunum.

Eg og Vera eiga 2 fittar gentir, Sólrun, sum er 18 ár, og Tórfríð, sum júst er blivin 13 ár. Hon hevur í eina tíð sagt, tá ið eg verið 13 ár verið eg tannáringur, og tað er orduliga well. Eg veit ikki um hon forbindur tað við at hon nú er eitt sindur meira vaksin. Allarhelst. Báðar okkara gentir eru sera aktivar í ítrótti, og hetta hava vit stuðla tær fult í. Tórfríð fæst harafturat nógv við tónleik. Eg vildi tó ynskt eg hevði brúkt eitt sindur meira tíð saman við teimum. Eg giti onnur hava tað nokk á sama hátt sum eg.

Mær dámar sera væl at ganga í fjøllunum, so tá ið eg sunnumorgunin vakti Tórfríð og segði at eg fór at ganga mær ein túr niðan á Kjøl, klárvaknaði hon, eg komi við, segði hon, og tað frøddi meg almikið. Aftaná at vit høvdu fingið okkum morgunmat, fóru vit avstað. Vit koyrdu út í Grøv, og hildu so leiðina niðan gjøgnum Gravardal. Veðrið var av tí fagrasta. Ein frálíkur túrur, eg tók fitt av myndum, sum tit kunnu síggja niðanfyri. Vit fóru til gongu umleið klokkan hálvgum 11 og vóru aftir hjá bilinum um 1 tíðina. Góðar 2 tímar.

Eg haldi Tórfríð dámar at ganga í fjøllunum. Hon sigur at hon hevur hug at ganga niðan á Háfjall, so hvør veit um vit ikki ein góðveðursdag í summar enda uppi á Háfjalli. Tá ætla vit at fáa Sólrun og Veru við, ein rætta fjallafamiljutúr.

Háfjall ein góðveðursdag

Tað er fríggjadagur, 10. august. Veðrið er av tí allar fagrasta, ikki ein skýkloddi á himli. Nokk besti dagur í ár. Eg sigi við Veru at í morgun ætli eg mær niðan á Háfjall. Hon heldur eg burdi heldur tikið eina hond i við babba, sum stríðist við at gera okkum tún omanfyri húsini. Men allíkavæl dugir hon gott at síggja at dagurin í dag er júst ein slíkur har fjøllini standa víðopin og bjóða inn.

Aftaná ein skjótan kaffimunn leggi eg til brots, klokkan er 10:30. Eg fari frá brunnunum og takið beint niðan ímóti niðasta hamara. Onkur vildi kanska gingið niðan á Brúnaskarð fyrst, sum er ein nakað lættari túrur. Men í dag ætlaði eg at gera skjótt av tí valdi eg hesa leiðini.

Eg brúkti 53 minuttir niðan og 34 minuttir omanaftur. Ein frálíkur túrur.

Niðanfyri eru nakrar myndir eg tók á túrinum.

Helgi eigur nógvar túrar niðan á Háfjall. Nú er nakað síðani, segði hann.

Hyttan hjá Archibald

Í dag hevur veðrið verið super, slíkar dagar eigur man at njóta góða veðrið. Longu tíðliga á degnum gjørdi eg av at fara eina hagatúr. Eg hevði hug at renna út í Grøv og so ganga niðan á Kjøl so norður í hyttuna hjá Archibald.

Dagurin leið við ymiskum átroknadi uppgávu, og hagatúrurin var nærum av ongum. Við einum breyðbita við skerpikjøti og eitt sindur av nøtum og rosinum fór eg frá húsum klokkan mundi vera 6.

Her eru nakrar myndir frá túrinum.